10 min met: Oop harte maak alles ligter
 

10 min met: Oop harte maak alles ligter

In 'n wêreld met soveel seer dink jy steeds soms dat jy die enigste een is wat deur 'n donker tyd gaan, maar wanneer jy soos Kimberley se Helpende Hand-span jou kop begin oplig en na die mense om jou begin omsien, ontdek jy vinnig dat jy nie alleen is nie en dat daar baie ander om jou is wat swaarder kry. Die span deel hulle suksesstories met ons en nooi jou om deel te raak.

Hoe lank is julle al aan die gang?

18 Jaar, in my tyd as leier van die groep, die naam het net verander met die jare.

 Die span hartklop?

Ons span wil graag sien dat mense wat arm, alleen en siek is, Jesus sal beleef, hulle wêreld en omstandighede sal verander en hulle deur hulle lewe weer deur riglyne dissiplineer. Die span doen dit deur hierdie mense in hul menswaardigheid te bedien saam met die liefde van Jesus.

Hoe het jul uitreike die spanlede self beïnvloed?

Ek dink almal wat ooit betrokke was by die HHB-span se lewens verander. Jy sien dinge wat meeste mense nie sien nie. Jy beleef hartseer en pyn saam met mense. Hulle is nie net gesigte nie, maar mense vir ons. Dit maak jou dankbaar vir dit wat jy het. Meeste mense kla te veel met ‘n brood onder die arm!   

Wat is die lekkerste deel van julle werk?

Om mense in nood te help en te sien hoe hulle omstandighede verander, byvoorbeeld wanneer jy by 'n ou tannie gaan sit en kuier en sien hoe haar hartseer gesig verander na 'n glimlag. 

Wat is die moeilikste deel van die werk?

Om soms vir mense NEE te sê. 

Hoekom doen julle die werk, wat gee julle die krag?

Ons doen dit wat ons doen, omdat dit ons passie is. Ons is Jesus se hande en voete in 'n donker wêreld.  

Mooi suksesstories:

De Beers-karavaanpark: Om te sien hoe n gesin waarby ons betrokke geraak het toe hulle op straat was, hul lewens drasties verander het. Hulle bedel nie meer nie, maar doen nou hulle eie ding op verskillende maniere om geld in te bring, onder andere om rommel te herwin. Ons is so trots op hierdie gesin, want deursettingsvermoë het ons lanklaas gesien soos by hierdie twee mense.  

Daar bly ook 'n ander oom en tannie wat gebid het vir 'n tweedehandse yskas, 'n tweeplaa stofie en skoene en die Here voorsien toe meer as waarvoor sy gevra het. Hulle kry toe vir haar ‘n splinternuwe yskas, 'n tweeplaatstofie met 'n oondjie by en die skoene wat sy nodig het. Sy het so gehuil toe dit gebeur, die trane het oor haar wange gerol van dankbaarheid en verbasing.

Vroeg in Mei het ek gevoel om drie komberse te vat vir 'n gesin in die karavaanpark.  Ons het toe die komberse bymekaargemaak en drie uitgesoek en karavaanpark toe gery. Daar gekom, vra ek  vir die eerste oom of hy 'n behoefte het aan 'n kombers en sy antwoord was: “Ja, ons kry baie koud, want die venster van die karavaan is uit en my kombers is stukkend”. Toe ek die groot gat in sy kombers sien, vra ek hom hoeveel komberse sal hy wil hê, waarna hy vir my antwoord drie, een vir my vrou, een vir 'n familielid en een vir my. Toe ek die oom wys dat ek presies drie komberse het, kon ek met trots verduidelik dat dit 'n opdrag van die Heilige Gees was om spesifiek drie te bring.

 

Ons Huis-projekte:  As ons span instap in die gang en hulle hoor dit is ons, verander hulle gesigte na 'n glimlag. Ons het 'n ouma wat 73 jaar oud was na die Here gelei voor sy oorlede is. Hulle verslind dit letterlik, omdat hulle dit nie  altyd gewoond is nie. Met die haresny en naelversorging geniet die oumas dit ook so baie en kan nie genoeg dankie sê nie. Daarom is dit vir ons net te lekker om elke keer net ons beste te gee.

 

Adopt 'n ouma.  Wat 'n voorreg is dit nie om 'n ouma of twee te kan aanneem nie. Ons besoek hulle en veral hulle verjaarsdae word spesiaal gemaak. Dit is tog so lekker vir hulle om te voel dat iemand nog aan hulle dink. Hier kan die oumas self getuig van hoe dankbaar hulle is vir elkeen van ons lede.

Van watter projekte kan ons gemeenskap deel raak?

  • Pak 'n Sak-projek
  • Kosbakkie-projek
  • Ons Huis-ouetehuis-uitreike            
  • Besoek een maal per maand
  • Adopt 'n ouma en oupa-projek
  • Cupcake-oggend een maal elke twee maande: Dit behels versorging van hulle hare, hande en naels gratis, asook 'n lekker kolwyntjie.
  • Hulpverlening aan behoeftige huisgesinne in De Beers-karavaanpark.
  • Klerekas: Hier kan behoeftige mense gehelp word met tweedehandse klere .

Hoe werk julle proses met mense wat julle help?

Elke behoeftige persoon word persoonlik gesien en vrae gevra, waarna ‘n vorm ingevul word en dan goedgekeur word. Hier kry ek dan die geleentheid as leier van die groep om my beradingskennis toe te pas. Wat hier baie belangrik is, is dat ons dan ook die geleentheid kry om mense na Jesus te lei.  Hier gee ons ook finansiële riglyne asook begrotingsriglyne.

Waar rook- en veral drankmisbruik is, is ons strenger. Mense word meer as een keer gehelp met die verstaan dat hulle na drie of vier maande moet wys hulle toon 'n verbetering. Mense wat nie wil werk om 'n inkomste te verdien nie, word in liefde reggehelp en riglyne gegee.

Hoe kan ons help?

Word deel van ons span, kom maak jou hande vuil, jy raak gou deel van 'n omgee-familie. Alternatief is enige skenking welkom en word aangewend vir die regte persoon en behoefte wat mag ontstaan. 

Julle droom vir die toekoms?

Dit is ons droom vir 'n huis of gebou waar ons behoeftige mense kan oplei in handvaardigheid, sodat hulle hulle  eie produkte kan maak om te verkoop. Hoe en waar weet ek nie, maar ek vertrou die Here vir dit. Ons droom ook van 'n huis vir bejaardes wat meer bekostigbaar is vir ou mensies wat nie dit kan bekostig nie. - Du Plessis Janse van Rensburg

Is jy al 'n lid van ons Facebook?

Read 242 times

Leave a comment

Make sure you enter all the required information, indicated by an asterisk (*). HTML code is not allowed.

booked.net
Watter kompetisie wil jy aan deelneem?