10 min met: Juffrou Duif Brand
 

10 min met: Juffrou Duif Brand

Waar sy kruisbeen sop die bank met ’n lekker koppie koffie in haar hand op ’n koue winterdag sit, straal sy net warmte en rustigheid uit. Dit is Duif Brand, of soos meeste mense haar ken, die geliefde juffrou Duif van die gr. R-klas bly Laerskool Staats. Haar noemnaam, Duif, is ook die perfekte beskrywing van haar sagte persoonlikheid - ’n vredemaker.  

Onderwys is in die Brand-familie

Duif is nie die enigste onderwyser in die Brand-familie nie. Haar man, Henk Brand, was vir jare lank die skoolhoof by Hoërskool Noord-Kaap (HNK) voordat hy dit verruil het vir die Suid-Afrikaanse Onderwysunie (SAOU). Hulle oudste seun, Janneman (21), gee tans in China skool, waar hy die klein Chinesies Engels leer, terwyl hulle jongste, Edrich (19),  onderwys studeer aan die Universiteit van Pretoria.
Dit is ook as onderwysstudent by die onderwyserskollege op Wellington waar Duif die liefde van haar lewe ontmoet het en vandag is sy en Henk al 30 jaar getroud. "Henk is my beste pel," vertel Duif met 'n sagte glimlag. "Ons kook saam kos, maar Henk kook beter," bieg sy. Saam kyk hulle ook graag rugby. "Ons was altyd nooit Blou Bul-ondersteuners nie, maar vandat Edrich vir Tukkies se 0/20-rugbyspan uitdraf, kan ons nie anders as om die span te ondersteun nie."

Lief vir die natuur

Duif is gaande oor die natuur. In die tyd wat Henk skoolhoof was by HNK het hulle in ’n huis agter Pirates-klub gebly. Dit is ook waar hulle geliefde swart labrador, Pirates, sy naam vandaan gekry het. Hulle huis by Pirates was vir haar lieflik, asof sy op ’n plaas bly, in die natuur. Maar toe Henk uit die onderwys bedank, het hulle in ’n woning gebly waar sy net nie weer tuis gevoel het nie. Dis toe wat hulle besluit om ’n skuif te maak en Magersfontein toe te trek. Weer daal daar ’n groot glimlag en rustigheid oor Duif. "Dis net wonderlik daar," vertel sy met deernis. "Daar loop mak bokkies om my rond, paddas wat kwaak in die nag en swane wat die prentjie voltooi." Die Brand-egpaar was aanvanklik bang vir die ver se ry in Kimberley toe elke dag, maar met ’n asemrowende sonsopkoms elke oggend op pad werk toe en ’n pragtige sonsondergang weer terug huis toe, doen hulle dit met ’n glimlag.

Hoekom onderwys?

Duif het as tiener besef sy is goed met kinders en omdat onderwys in die daardie tyd die maklikste studierigting was waarvoor jy ’n beurs kon kry, het sy onderwys as haar beroep gekies. En vandag, 30 jaar later, is sy nie ’n oomblik spyt nie. Toe sy en Henk in 2005 na Kimberley verhuis het, nadat hy die pos as skoolhoof by HNK aanvaar het, het Duif eers vir ’n geruime tyd by verskeie skole afgelos. Dis eers in Januarie 2006 wat sy vas aangestel is by Laerskool Staats. "Ek het dadelik tuis gevoel en dit was so lekker om weer standvastig te wees en my naam op ’n personeellys te sien," lag sy.

Die kreatiewe kant

Nie net is sy lief vir die natuur nie, maar is sy ook lief vir kuns. Deur ’n gr. R-juffrou te wees, kan sy haar passie vir kuns uitleef deur die werk wat haar leerders daagliks doen. Sy vertel ook dat sy haar seuns aangemoedig het om kunslesse te neem. Alhoewel hulle tog van hulle ma se kreatiewe gene geërf het, was rugby steeds hulle eerste keuse. "Ek het van my seuns se mooiste skilderye geraam en dit is vir my meer werd as enige beroemde skilder se handewerk," vertel Duif met trots.

Bietjie van Duif se kinderjare

Weens Duif se pa se beroep het hulle as kinders baie rondgetrek en was sy in sewe verskillende skole. Elke keer moes sy in die middel van ’n skooljaar die uitdaging aanpak om nuwe vriende te maak. "Dit vat aan jou selfbeeld," vertel sy. Maar dit het gemaak dat sy vandag baie deernis het vir ’n nuwe kind in die skool. Sy verstaan hulle vrese en onsekerheid.

Duif die onderwyseres

Vir hierdie dierbare juffrou is die beste ding van haar beroep die onvoorwaardelike liefde wat sy daagliks van die kinders in haar klas ervaar. "Die woorde 'môre Juffrou' elke oggend gee net 'n wow-gevoel. Dit is so bevredigend om te sien hoe ’n kind vorder en ontwikkel."  Duif is ook in beheer van Staats se redenaarspan. Om hulle af te rig, is haar passie. Dit gee haar soveel genot as sy sien hoe dit hulle selfbeeld ontwikkel.

Wat weet ons nie van Duif nie

Sy dink ’n rukkie oor die vraag en dan antwoord sy met ’n skaam glimlag: "Ek hou baie van dans. Soms dans ek sommer in my kombuis." - Alta van Wyk

 

Is jy al 'n lid van ons Facebook?

Read 106 times

Leave a comment

Make sure you enter all the required information, indicated by an asterisk (*). HTML code is not allowed.

booked.net
Watter kompetisie wil jy aan deelneem?