Bederfdag: Gebore onderwyseres
 

Bederfdag: Gebore onderwyseres

Joe-Marie Vink leef haar passie vir kinders by Patroontjies-kleuterskool uit. Dis hier waar sy elke dag probeer om ’n verskil in die toekoms van ’n handvol kleuters te maak.

Jy het al in jou matriekjaar as assistent by die kleuterskool uitgehelp. Het jy maar altyd geweet jy wil met kinders werk?

Kinders was maar nog altyd my passie. Ek het al amper twee jaar my eie klas by die kleuterskool. Die hondjieklas se kinders is tussen vier en vyf jaar. Dis vir my ’n groot verantwoordelikheid, omdat hulle in dié stadium soveel mylpale moet bereik om te verseker dat hulle later reg vir skool is.

Wat is vir jou lekker van jou beroep?

Om elke dag daardie kindertjies se gesiggies te sien. Dis ook vir my baie bevredigend om hulle vordering dop te hou soos wanneer hulle byvoorbeeld die springtou bemeester en tot elf tel. Daar is so baie mylpale wat hulle nou moet bereik. Dis lekker om te sien al jou harde werk beteken iets.

Wat is vir jou moeilik van jou werk?

Ek het sewentien kinders in my klas en hulle kan ’n handvol raak! En ongelukkig is daar altyd kinders wat uit gebroke huisgesinne en moeilike omstandighede kom. Baiekeer is sulke kinders teruggetrokke en moet ek harder werk om hulle deel van die klas te maak. Ek werk ook lekker met my kollegas saam, hoewel ’n mens nie altyd oor alles saamstem nie. Elkeen het maar sy eie manier van werk.

Vertel my van jou familie

Ons is almal baie aan die gang, energiek, lief vir kuier en grappies vertel. Ek het een jonger broer, Ruan. Baie sê ons lyk soos ’n tweeling. Ons kom goed oor die weg, maar moet ook nie te veel saam kuier nie!

Wat is vir jou belangrik in die lewe?

Vriendskap. Om mense in jou lewe te hê wat jou ondersteun en lief het, maar dit werk albei kante toe. Jy moet ook bereid wees om ander mense te help en by hulle lewens betrokke te raak. Jy kan nie net self voortploeter nie. Ek en my baas, Santie, het ’n baie goeie verhouding. Ek help haar by die kerk, gee Sondagskool en pas kinders in my vrye tyd op.

Watter tipe mens is jy?

Ek sal myself as vrolik beskryf, maar ek verkies kleiner groepe en een tot een gesprekke, waar ’n mens oor die dieper dinge van die lewe kan gesels.

Hou jy van klere en mooi aantrek?

Ek is baie vol fiemies as dit by klere kom. Ek is maar ’n plain Jane en dra meestal denims, T-hemde en plakkies. In die winter is dit boots. Ek sal ook eerder ligter kleure as swart of grys verkies.

Spandeer jy baie tyd aan jou voorkoms?

Ek dra omtrent nooit grimering nie, net vir ’n spesiale geleentheid. Ek het nog nooit my hare in ’n styl gesny nie en is baie opgewonde oor die nuwe haarstyl en voorkoms wat Glitter vir my beplan. Dit moet egter net nie baie moeite wees om dit mooi te laat lyk nie.

Wat wil jy nog doen in die lewe?

My groot passie is maar vir kinders. Ek wil meer kinders wat swaarkry bereik en byvoorbeeld by ’n kinderhuis betrokke raak. Ek is ook tans besig met 'n onderwysgraad deur Unisa.

Is dit vir jou moeilik om deeltyds te studeer?

Ek het al baie kursusse oor kinderbediening en -opvoeding gedoen. Ek het vanjaar reeds vir twee vakke ingeskryf en wil graag my B.Ed.-graad voltooi. Ek dink dis ongelooflik belangrik om jou passies uit te leef. ’n Werksdag kan baie lank raak as jy nie hou van wat jy doen nie. Jy kan so in ’n gat beland waaruit jy nie maklik gaan uitkom nie.

Raak jy maklik depressief?

’n Dag kan soms lank en uitputtend raak, maar ek is gou weer myself. Ek is nie iemand wat tob oor my probleme nie. Ek praat met iemand, pak af of bou graag legkaarte, luister na musiek en vergeet ’n rukkie van die wêreld.

Wie is jou rolmodel?

Daar is sommer ’n klomp. Ek en Santie het ’n baie hegte band. Ek is lief vir haar en bewonder haar oor hoe sy die kleuterskool bestuur. Sy is ook iemand na wie ek opkyk en respekteer. Niekie het ongelukkig getrek. Ek en sy het saam klasgegee en ek het groot skoene om vol te staan. Baie van wat ek vandag weet, het ek by haar geleer. Sy was soos ’n handboek en het net alles geweet. Ek kon ook na ’n lang dag by haar afpak. Ek sal graag eendag so ’n onderwyseres wil wees.

En watter tipe juffrou is dit?

Ek wil hê die kinders moet na my opkyk en eendag ook soos ek wil wees. Hulle moet kan sien dat ek vir hulle elkeen lief is en werklik omgee. Ek wil ’n verskil in kinders se lewens maak en dit verryk.

Wat is vir jou belangrik in mense?

Eerlikheid, regverdigheid, geloof en ’n sterk waardestelsel. – Ilette Coetzer

 

Baie dankie vir hare en grimering:
- HARE:
- GRIMERING:
- PEDIKUUR:
- NAELS:
- KLEREDRAG EN STILERING:

 

Is jy al 'n lid van ons Facebook?

Read 292 times

Leave a comment

Make sure you enter all the required information, indicated by an asterisk (*). HTML code is not allowed.

booked.net
Watter kompetisie wil jy aan deelneem?