Bederfdag: 'n Lewe van omgee
 

Bederfdag: 'n Lewe van omgee

Madri Botes lewe vir haar gesin. Maar sy stel nie net hulle behoeftes eerste nie, maar ook dié van haar vriendinne en kollegas.

Vertel my meer van jouself en jou gesin.

Ek was maar vyf toe ek saam met my ouers, sussie Rencia en boetie Antonie, van Pietersburg na Kimberley verhuis het. Na skool is ek Kovsies toe vir ’n jaar BA Beeldende Kunste en toe BA Ed grondslagfase. Onderwys was egter nie my roeping nie en ek het in 2007 by Liberty begin werk. My dogter, Merencia, is in Julie 2007 gebore en slegs een jaar en nege maande later het Anro gekom. Ek en Marc, my lewensmaat van 2004 af, het maar swaar gekry, maar was gelukkig en kon met geruste harte sê wat ons het, het ons voor gewerk. Marc het my nog altyd gemotiveer om myself te verbeter. Vandag is ek ’nTPS-spesialis by Standard-bank in die Noord-Kaap.

Wat geniet jy van jou werk?

Elke dag is anders met nuwe kliënte en omstandighede wat verskil. My kollegas is vol liefde en passie vir hulle werk. Hulle is my familie van agt tot vyf. As die Blou-span toesak, weet jy hulle is bereid om ’n pad met jou te stap.

Julle is ’n baie hegte gesin?

Ek probeer alles vir my kinders wees. Dit beteken jy as ouer stel hulle eerste vandat jy opstaan tot jy jou kop saans neerlê. Ons hou daarvan om te braai en dan saam met die kinders te swem en te baljaar. Marc sal sommer ’n tent in die agterplaas opslaan, en dan slaap ons daar. Of ons sit musiek aan en is lekker laf! Baiekeer word ’n matras voor die TV gegooi en dan word daar gefliek.

Jy het drie kinders - wat beteken hulle vir jou?

In een woord - alles. Al drie my kinders het hulle eie persoonlikhede. Merencia is my ewebeeld en regterhand. As Mamma uitstedig is, weet ek sy kan oorneem en alles hanteer. Anro is my Boeta-bout. ’n Tipiese seun met waaghalsige idees en eksperimente. My slim mannetjie met ’n hart vir diere. Nee kyk, as ’n dier seergekry het, is Anro daar. Ou Gogga-pop, Marihandri is nou twee. Sy is ons gesin se blessing van ons Hemelse Vader.

Watter lewenslesse wil jy graag aan jou kinders oordra?

Lewe jou lewe sodat God nommer een is. Dit maak nie saak wat ander mense dink nie. Hulle opinies is nie so belangrik nie. Wees lief vir mekaar. Die lewe is kort en dinge kan in ’n oogwink verander. Doen dit wat jy doen, goed en geniet elke oomblik. Jou herinneringe kan niemand van jou wegneem nie.

Jou vriendinne beskryf jou as iemand wat ander altyd eerste stel ten koste van jouself. Stem jy saam?

Oe jitte, ek geniet my vriendinne vreeslik baie en hulle beteken die wêreld vir my. Dis mos maklik om mense vir wie jy lief is, eerste te stel. Hoekom dan nou nie?

Wat ontstel jou?

Onregverdige veroordeling. Mense wat neerkyk op ander en kinders wat anders hanteer word omdat hulle anders is.

Jou jongste is maar twee, maar jy en Merencia geniet dit om naweke girly dinge saam te doen.

Merencia se hare is vreeslik lank en moet gereeld uitgekam word. Dan sit ons ’n haarmasker op, doen ons naels, gee facials, en speel dress up. Dit gebeur egter nie so gereeld soos sy sou wou hê nie. Sy is mal oor pamperlang-sessies.

Dink jy mense maak 'n te groot bohaai van skoonheid?

Ek dink dit is maklik om ’n bohaai van skoonheid te maak. Op die ou end wil almal mooi lyk. Ek glo egter dat skoonheid nie iets is wat jy op jou gesig kan plak nie. Dit is iets wat van binne af kom. Skoonheid wat opreg is, hou ’n leeftyd. Is dit lekker om mooi aan te trek? Vir seker. Is dit lekker om ’n kompliment te kry? Beslis. Maar ons almal word ouer. ’n Vrou wat van binne mooi is, het ’n tipe skoonheid wat vir ewig hou.

Sal Marc agterkom as jy jou hare sny, of iets nuuts koop?

Ja, definitief. Hy is baie oplettend en ek sal altyd sy raad en opinie vra. Hy is na alles die een wat soggens langs my wakker word.

Elke vrou het iets waarsonder sy nie kan klaarkom nie, wat is joune?

My handsak. En daar is enigiets in, van speelgoed en lekkers tot tandepasta en medisyne. Natuurlik ook ’n grimeersakkie vir onvoorsiene tye.

Sien jy uit na die voorkoms wat Glitter vir jou beplan? Hoekom?

Ek is ’n bietjie skrikkerig, maar glo en vertrou dit sal mooi lyk. Ek dink dit gee net daai ekstra “oemf” om dit te doen wat jy onder normale omstandighede nie kans voor kry nie. Dalk help dit iemand anders ook om moed bymekaar te skraap om ’n verandering in haar lewe te maak. – Ilette Coetzer

 

 

 

Is jy al 'n lid van ons Facebook?

Read 141 times

Leave a comment

Make sure you enter all the required information, indicated by an asterisk (*). HTML code is not allowed.

booked.net
Watter kompetisie wil jy aan deelneem?