Bederfdag: Wow, is dit regtig ek?
 

Bederfdag: Wow, is dit regtig ek?

Roani Bowie het al baie swaar in haar lewe gehad, maar sy glo nie aan opgee nie. Die Glitterspan het haar vir ’n dag bederf en gewys dat die lewe soms vir jou glimlag.

Roani moes van kleins af na haarself kyk. Weens moeilike huislike omstandighede, het sy op veertien, op straat beland. Sy het haar man, Ryan, in Springs ontmoet en hulle het landwyd begin swerf. Die twee het uiteindelik op Kimberley hulle voete gevind. Roani en Ryan het begin om springmielies en tjips langs die straat te verkoop, maar Roani se gesondheid het haar in die hospitaal laat beland. Sy het ’n bloedklont in haar been gekry, en kon nie verder werk nie.

Vandag pla die bene nog, maar sy en Ryan het by hul tuiste by Kimberley karavaanpark, begin om rommel te herwin. Plastiek, glasbottels, koerante, tydskrifte, elektriese ware, glas en blikkies word sorter en aan Kimberley Recycling verkoop. Vir ’n kilogram gaskoeldrankbottels, kry hulle een rand sewentig, terwyl glas die minste werd is en teen 20 sent per kilo verkoop word. Maar die besigheid help om hulle huur en ander onkostes te betaal.

Roani droom van haar eie plekkie, een wat groot genoeg vir hulle besigheid is. Die Glitterspan het gehelp om een van haar ander drome te bewaarheid. Toinette Janse van Rensburg van Glitter sê Roani het dit reggekry om haar lewe te verbeter, om letterlik uit die rommel op te staan en iets van haar lewe te maak. Sy het ten spyte van haar haglike omstandighede, haar lewe weer bymekaar gekry. Sy en Ryan het niks gehad nie. Hulle het jare lank op straat gebly en gebedel. Vandag het hulle blyplek in ’n karavaanpark, en verdien ’n gereelde inkomste uit herwinning van rommel. “Jy het vandag ons almal inspireer. Dis nie elkeen wat dit kan regkry nie. Ek wil hê jy moet weet ons sien jou raak. Jy het ons met jou getuienis gebless.”

Roani is deur die span onder hande geneem, en spog nou met ’n nuwe haarstyl en voorkoms. Sy verkies gemaklike klere en broeke met wye pype. “Ek kan nie met sulke stywe klere werk nie.” Sy is ook nie een vir rokke of rompe nie. “Dit werk net nie vir my nie.”

Roani is baie ingenome met haar nuwe voorkoms. “Dit was heerlik om so bederf te word. Ek het myself amper nie herken nie!” Sy was mal oor die nuwe klere, maar sê al die aandag het haar bietjie oorweldig. – Ilette Coetzer

Before foto van Roani:

 

 

 

Is jy al 'n lid van ons Facebook?

Read 433 times

Leave a comment

Make sure you enter all the required information, indicated by an asterisk (*). HTML code is not allowed.

booked.net
Watter kompetisie wil jy aan deelneem?