Coffee Break: Trek jou reisskoene aan
 

Coffee Break: Trek jou reisskoene aan

Daar is dinamiese mense wie se planne nooit opraak nie en wat nooit moeg word daarvoor om ander te help om hulle drome te laat waar word nie. Een van hulle is Rina Hansen (55).
Rina is geen onbekende in Kimberley nie. Waar ons in ’n besige koffiewinkel sit en gesels en koffie drink, kom groet iemand haar elke nou en dan en vra uit oor haar volgende reis, vertel van hulle onlangse besoeke iewers. Hoe dan anders? As ’n reiskonsultant vir Travel Coucellors weet Rina presies hoe om aan mense se begeertes gestalte te gee.

Rina werk reeds van 1995 as ’n reiskonsultant. Van die dienste wat sy lewer, is om mense te help om hulle vakansie presies te beplan, aansoek vir visums te doen, verblyf-en vliegreëlings te tref en net algemene bystand te lewer. En omdat sy dit reeds vir jare doen, het sy baie waardevolle raad aan mense wat graag wil reis.

Doen goeie beplanning

Soos met soveel ander dinge in die lewe is voorkoming beter as genesing as dit by ’n buitelandse reis kom, sê Rina. “Mense moenie sommer net aan ’n bestemming dink en daarheen vlieg nie. Om jou reiservaring aangenaam te maak en te help dat dinge vlot verloop, is dit nodig om beplanning te doen.” Sy sê die eerste ding waaraan mense moet aandag skenk, is hulle paspoorte. ’n Paspoort is net vir 10 jaar geldig en moenie verval binne ses maande van jou terugkomsdatum nie. Nog belangrike raad is mense moet seker maak of hulle bank- of kredietkaarte in ander lande werk. “Ook is daar spesifieke reëls ten opsigte van bagasie. Behalwe vir die beperking op gewig, is daar ook deesdae spesifikasies oor die vorm van jou bagasie. En daar is sommige dinge, soos vloeistof, wat nie in ’n mens se handbagasie toelaatbaar is nie.”
Sy sê wanneer mens vreemd is in die buiteland en nie weet wat aangaan nie, vra vir hulp. Veral op lughawens is daar baie mense wat aangestel is om hulp te bied.
Rina sê dit is heeltemal moontlik om ’n buitelandse toer op jou eie te beplan. Die internet, AirBnB en verskeie hulpmiddels is beskikbaar. Die verskil om ’n toer saam met ’n kundige te beplan, is dat hulle oor kennis beskik wat nie altyd vir almal beskikbaar is nie - soos vlugte wat verander of gekanselleer word en dies meer.

Bekostigbare reis

Met die Suid-Afrikaanse rand wat nie baie sterk is nie, is ’n oorsese reis baie duur en nie sommer iets wat enigiemand kan bekostig nie. Maar, sê Rina, daar is darem goeie nuus. “Daar is sekere plekke waarheen ’n mens steeds redelik goedkoop kan reis. Weer eens moet ’n mens net jou beplanning deeglik doen en reeds lank voor die tyd daarmee begin.” Dele van die wêreld waar dit steeds goedkoper is, is die Ooste - plekke soos Phuket, Bali en die Filippyne is baie gewild en bied bekostigbare moontlikhede. Rina is uiteraard baie lief vir reis en het al verskeie dele van die wêreld verken. Sy en haar man, Hennie, wat saam met haar werk, is juis op die oomblik by hulle kinders in Amerika.
“Om te reis, is werklik iets wat ’n mens se lewe verryk en jou horisonne baie verbreed. ’n Mens leer baie van jouself en van ander kulture. Dit gee mens ’n goeie idee oor waarom mense verskil en wat vir mense belangrik is.”

Sakevrou en ma

Enige ma sal beaam dat om voltyds te werk en ma te wees nie elke dag maklik is nie. Die dilemma is om iets te kry waarmee jy jou passie kan uitleef, maar om ook jou kinders te kan sien grootword. Rina sê hoewel dit nie altyd maklik is om vir jouself te werk nie, help dit om ’n werk te hê waar jou ure aanpasbaar is en wat jy van die huis af kan doen. “Daarom sal ek altyd baie dankbaar wees dat ek my onderneming van die huis af kon doen.”  Rina het twee volwasse kinders.

Kimberley as reisbestemming

En indien jy nie ’n buitelandse reis kan bekostig nie, verken jou eie provinsie en omgewing. “Ons stad bied wonderlike toerismegeleenthede. Daar is baie meer om hier te doen as bloot ’n besoek aan die Groot Gat.” Kimberley en sy omliggende omgewing het soveel historiese waarde. Sy sê mense wat ‘n liefde koester vir hoe dinge dekades gelede was, kan hulle hier kom uitleef. “Ook het ons ’n wonderlike wildlewe met verskeie private en nasionale parke waar ’n mens regtig van die mooiste diere in die land kan sien. En dan is daar natuurlik ook die sonsondergange hier wat ’n mens self met jou eie oë moet beleef.” - Karen van der Berg
 

Is jy al 'n lid van ons Facebook?

Read 865 times

Leave a comment

Make sure you enter all the required information, indicated by an asterisk (*). HTML code is not allowed.

booked.net
Watter kompetisie wil jy aan deelneem?