Fokus Op Kom ons maak eko-bakstene
 

Fokus Op Kom ons maak eko-bakstene

Kimberley, die Noord-Kaap, Suid-Afrika en die hele wêreld sit met een enorme probleem: plastiekbesoedeling. Daar word beraam dat daar teem 2050 waarskynlik meer plastiek as visse in die see sal wees. Dit is tyd dat ieder en elk, groot en klein, begin saamwerk om die reusekrisis te probeer afweer. Ons moet minder plastiek gebruik en dit was ons gebruik, herwin! Glitter vertel jou meer.

Eko-bakstene

As jy teen dié tyd nog nie weet wat eko-bakstene is nie, is dit nou die tyd om te leer. Dit kan dalk een van die groot antwoorde op die wêreld se plastiekkrisis wees, ook hier in die Diamantstad wat glad nie meer skitter nie.
Die bou en gebruik van eko-bakstene is ’n herwinningskonsep wat vinnig in Suid-Afrika veld wen. Verskeie besighede, skole en  nie-regeringsorganisasies gebruik koeldrankbottels, volgepak met nie-herwinbare plastiek, om meubels, muurtjies en selfs geboue te bou.

Waarom is dit nodig?

Plastiek is nie iets wat ooit afgebreek kan word nie en dit is besig om veral die aarde se dierelewe te beskadig. Op 16 Maart vanjaar is ’n jong snoetwalvis dood op ’n strand gevind, met 40 kg plastiek in sy maag. Hy het op ’n strand in die Compostela-vallei (Fillipyne) uitgespoel. Van die plastiek wat in hom gevind was, het ingesluit: 100 plastiekbekers, 25 plastieksakke, vier plastiekbottels en een paar plakkies. Daar word beraam dat daar jaarliks sowat 8 miljoen ton plastiek in oseane beland.

Nog feite oor plastiek
 
-Sedert die 1950’s is daar wêreldwyd ongeveer 8,3 miljard ton plastiek vervaardig. Dit is gelykstaande aan die gewig van 800 000 Eiffel-torings. Slegs 9% daarvan is herwin.
-Daar word elke minuut sowat 4 miljoen plastiekbottels gekoop.
-Daar word elke minuut sowat 2 miljoen plastieksakke gebruik.
-Een plastieksak word vir ongeveer 12 minute gebruik.
-Sommige van hulle kan tot ’n 1 000 jaar neem om afgebreek te word.

Oplossings:

Behalwe vir die maak van eko-bakstene moet skole, organisasies, restaurante en huishoudings begin nee sê vir die gebruik van eenmalige-gebruik plastiek.
Ons kan ’n verskil maak deur eenvoudig te vra om nie ’n strooitjie te kry wanneer 'n drankie bestel word nie. Dit voel dalk nie of jy die planeet op jou eie kan red nie, maar dis hierdie klein gewoontetjies wat bewustheid skep en jou invloed kan versprei. Een klein gebaar kan ’n reuse-impak hê.
Versprei die woord. As iemand opmerk dat jy nie ’n strooitjie gebruik nie, verduidelik waarom nie. Die meeste mense se lewensgehalte sal nie deur die afwesigheid van strooitjies beïnvloed word nie.
As jy nie gereed is om heeltemal van strooitjies af te sien nie, is daar ander opsies vir herbruikbare strooitjies - bamboes, vlekvrye staal, papier, silikoon, behandelde glas, ensovoorts. Om op te som: As jy wil hê die toekoms moet ’n gesonder een wees, is dit vandag tyd om met plastiekstrooitjies weg te doen. En vertel jou vriende om dieselfde te doen.
Jy moet leer om jou eie sakke saam te neem winkels toe en nie plastieksakke koop nie. Neem jou eie sakke saam winkel toe. Moet nooit ’n plastieksak koop as jy min items koop nie, dra bloot die items sonder 'n plastieksak.
Koop vir jou en jou gesin glasbottels en neem dit vol water saam wanneer jy op ’n uitstappie gaan, eerder as om gebottelde water in plastiekbottels te koop. Jy spaar geld en jy dra nie tot plastiekbesoedeling by nie.
Leer ook om jou eie beker saam te vat op die pad. By die meeste plekke waar jy wegneemkoffie bestel, kan jy net jou eie beker gee en hulle maak hom vol.
Maak dit jou nuwe leefstyl.
 
Hoe om eko-stene te maak

Om eko-bakstene te maak, is nie moeilik nie. Versamel jou 500 ml, 1 liter en 2 liter koeldrankbottels en vul dit met alle plastiek wat nie herwinbaar is nie. Dit sluit lekkergoedpapiertjies, oorstokkies, plastieksakkies ensovoorts in. Dit word klein opgevou en dan styf in die bottels gedruk. Die plastiek kan met ’n dun voorwerp, soos ’n stok, platgedruk word om genoeg plastiek in te kry sodat die bottel 400 - 500 g weeg. Die bottel moet baie styf gevul word sodat wanneer jy daarop staan, dit glad nie iewers induik nie. Die plastiek moet skoon en droog wees. Indien jou plastiek bietjie vuil is, was dit, hang dit op vir so 'n uur en druk dit in die bottel.
Wanneer jou bottel vol is, kan jy dit na Pick n Pay Hypermarket neem wat dit weer op hulle beurt versprei. Dit is tyd dat Kimberley 'n afsetgebied kry waarheen die bottels geneem kan word.

Algemene plastiek in huishoudings

Verpakking: doekpakke, weggooibare waslappies, ys, gevriesde groente, gewone groente soos sampioene, vrugte (soos appels, piesangs, lemoene), lekkergoed, koekies, strooitjies.
Sakkies van cappuchino, koffiebone.
Bevrore vleis.
Sakke waarin ons hout koop om te braai.
Jogurt- en botterbakkies.
Kinderspeelgoed se verpakking, rekkies en ballonne.

Glitter-lesers

Op ons Facebook-groep het ons lesers baie positief op die maak van eko-bakstene reageer. Nou het julle al die inlgting. Begin nog vandag en plaas julle foto’s op ons muur.
Vir meer inligting:
Facebook-groep: EcoBrick Exchange
Bronne: www. Globalcitizen.org, www.goeiehuishouding.com

Naskrif: Karen van der Berg, die joernalis wat die artikel saamgestel het, en haar gesin maak al ses maande eko-bakstene. Haar wenk is om ’n houer te kry en al julle plastiek daarin te versamel. Maak dan een keer ’n week stene sodat dit nie ’n daaglikse werk word nie. Hulle leef ook al ses maande sonder strooitjies, neem hulle eie sakke saam winkels toe, koop glad nie meer gebottelde water nie en sê dit is glad nie moeilik om die veranderinge te maak nie. Hulle gebruik ook nie meer kleefplastiek in die huis nie en het 'n klomp glashouers met deksels gekoop om oorskietkos in te bêre.
 

Is jy al 'n lid van ons Facebook?

Read 304 times

Leave a comment

Make sure you enter all the required information, indicated by an asterisk (*). HTML code is not allowed.

booked.net
Watter kompetisie wil jy aan deelneem?