Leser: Familieman deur dik en dun
 

Leser: Familieman deur dik en dun

Philip Piek het die begin van die jaar die Wes-Kaap vir Kimberley verruil om sy skoene in hulle familiebesigheid vol te staan.

Jy het siviele ingenieurswese op Stellenbosch studeer. Vandag is jy egter ’n bestuurder by ’n nuwe vulstasie in Kimberley. Hoe het dit gebeur?

Ek het ses jaar in die Kaap in die konstruksiebedryf gewerk. Ek dink dit het my voorberei vir waar ek vandag is. Ek het altyd geweet ek gaan eendag by my pa aansluit. Hy het het dertien vulstasies in Bloemfontein, De Doorns en die Paarl, maar ek wou eers my voete vind.

Jy en jou vrou, Joan, het die begin van die jaar Kimberley toe verhuis. Het jy ooit gedink dat jy die Wes-Kaap vir die Noord-Kaap sou verruil?

Ek het altyd geweet ek gaan eendag ook deel van ons familiebesigheid word, maar nooit gedink ek sou my in Kimberley vestig nie. Ek is egter mal oor die dorp. Die mense hier is baie ontvanklik en help waar hulle kan. Die Kaap het meer gevestigde vriendekringe, en is nie so hartlik met buitestaanders nie. Ek en my vrou is baie gul ontvang en dit maak die aanpassing soveel makliker.

Jy en Joan is albei lief vir die natuur en buitelewe, nè?

Ja, ons hou albei baie van fietsry en draf. Ons werk maar lang ure en dis nodig om ’n balans te handhaaf. Ek dink ook dis goed om in die natuur te kom, net om jou kop so nou en dan skoon te maak.

Was dit vir jou moeilik om skielik saam met jou familie te werk?

Nee, nie regtig nie. Dit is vir my eintlik ’n groot voorreg. My pa is ’n uitstekende sakeman en ek kan so baie van hom leer. Ek dink ook ons vul mekaar goed aan. Ek was vir ses jaar in die konstruksiebedryf en kon my ervaring hier gebruik toe ons die vulstasie gebou het.

Stamp julle ooit koppe?

Ek dink mense verskil in enige besigheid, maar ons probeer om mekaar se mening te respekteer. Geen idee word sommer net afgeskiet nie. Daar is begrip en waardering vir mekaar. My vrou werk ook nou in die besigheid en dis wonderlik om haar elke dag te sien. Ek is maar ’n familieman en hou van my mense om my.

Hoe kweek julle lojaliteit in julle besigheid?

Ons glo daaraan om mense te bevorder en te beloon. As daar ’n pos beskikbaar is, word hy eers intern geadverteer. Een van ons administratiewe bestuurders het destyds in die Kaap as ’n skoonmaker begin. Een van ons rakpakkers is ook vandag ’n vloerbestuurder. Enige persoon kan homself verbeter. Ek glo mense moet net die geleentheid gegee word. Ek is passievol oor ons besigheid en wil graag hê ons werknemers moet in ons waardestelsel inkoop. Hier kyk ons na mekaar, maar dit is ’n spanpoging. Elkeen van ons is op die ou end afhanklik van mekaar om die projek ’n sukses te maak. Ek kan dit nie alleen doen nie.

Is dit vir jou moeilik om jou werkslewe van jou persoonlike lewe te skei?

Nie regtig nie. Ek dink dis die enigste manier wat werklik kan werk. Soms moet jy kwaai met iemand by die werk wees, maar dan praat ons dit uit en sit dit agter ons. Vanaand kuier ons weer saam.

Wat is vir jou moeilik van julle bedryf?

Die lang ure. Jy moet eintlik maar 24 uur per dag beskikbaar wees. En dinge loop gewoonlik eers na-ure skeef! Dan moet jy dit uitsorteer. Kliënte verstaan dit nie altyd nie, maar ek weet jy gaan altyd mense hê wat ongelukkig oor iets is. Jy kan nie almal gelukkig hou nie, hoewel ons op dienslewering fokus. Ons is nog outyds en probeer ’n kultuur van diens vestig.

Wat geniet jy die meeste van die werk?

Ek en Joan is mense-mense. Die teenpool van kliënte is ook waar. Daar is so baie wat wys dat hulle jou waardeer. En ek geniet dit om met personeel te werk. Ek probeer ’n punt daarvan maak om met elke werker op sy vlak as ’n gewone mens kommunikeer, van die skoonmakers tot die bestuur. Almal verdien om met respek behandel te word. En dan is daar die werk self. Dis ’n wonderlike uitdaging. As ingenieur moes ek heeltyd planne maak en probleme oplos. Dit is nou nog so. Dis wie ek is. Ek wil dinge regmaak, so gou as moontlik. Môre is nie nog ’n dag nie…

En jou swakpunte?

Ek is baie hardkoppig en wil iets gister al gedoen gehad het. Ek weet ek moet ook meer luister na ander en soms net ’n skouer vir ander wees, maar ons mans is mos maar so - ons wil alles dadelik regmaak. Maar my vrou werk daaraan… – Ilette Coetzer

Is jy al 'n lid van ons Facebook?

Read 152 times

Leave a comment

Make sure you enter all the required information, indicated by an asterisk (*). HTML code is not allowed.

booked.net
Watter kompetisie wil jy aan deelneem?