Ontmoet vir: Johan Fourie tussen ghries en olie
 

Ontmoet vir: Johan Fourie tussen ghries en olie

Johan Fourie het ‘n liefde vir enigiets meganies, spesifiek lorries en vinnige, warmgemaakte karre. Glitter het met hom gesels oor hierdie passies en hoe sy lewe daarmee verweef is. 

Vertel ons meer van jou grootworddae 

Ek het grootgeword in Kimberley. Ons het 'n paar jaar op Upington gebly, maar ek, my ma en my broer het weer hierheen verhuis toe my ouers geskei het. My ouers het nog altyd 'n groot rol gespeel in my lewe. Al was hulle geskei, het beide steeds moeite gemaak om hulle rolle so goed hulle kon te vervul. 

My pa het my geleer dat mens die kanse wat jy kry, moet aangryp, omdat die wêreld vir niemand wag nie en ook dat jy nie een enkele dag weer oor kry nie. Hy het my ook geleer om wat ook al ek doen die beste te doen. My gunsteling-kinderherinnering is toe ek saam met my pa lorrie gery het. Dit is ook waar my liefde vir swaarvoertuie begin het. 

Hoe was jou skooldae? 

My gunstelingvak op skool was tegniese tekeninge. Ek het baie daarvan gehou om te teken, iets wat ek tot vandag toe nog geniet wanneer ek tyd kry. Ek glo nie ek was die populêrste kind op skool nie, maar ek het goeie vriende gehad. Wat ek wel weet, is dat ek baie stout was. Ek is bly my ma het my nog lief, want ek het haar al haar dae gegee op skool. Ek kon regtig nie vir beter ouers vra nie; hulle was altyd daar vir my, al het ek soms nonsens aangevang. 

Ek het nie deelgeneem aan sport op skool nie, maar eerder gehou van ekstreme sportsoorte soos trick bike en dirt bike ry  en skateboarding

Deel 'n storie van jou skooldae 

Ek het dit geniet om na skool en oor naweke te gaan off road ry met my motorfiets by die mynhope. My ma het my altyd gewaarsku dat ek nie met die motorfiets op die teerpad moes ry nie, omdat die verkeerspolisie my sou aftrek, maar ek moes daarop ry om by die mynhope uit te kom. 

Ek het een middag soos gewoonlik koers gekies na die mynhope via die teerpad en daar gaan baljaar vir die middag. Op pad huistoe ry ek toe oor Langstraat waar die polisie my toe gewaar en agternasit. Ek maak toe die dom besluit om vir hulle te probeer wegry deur met agterpaadjies en oor velde te ry. Toe ek uiteindelik by die huis kom, het die polisie my ingewag met 'n groot boete en ek is ook die Leviete voorgelees sodat ek dit nie weer moes doen nie. 

Hoe het jy besluit om jou eie besigheid oop te maak? 

Ek en my neef werk nog altyd baie goed saam en eendag toe ons gesels oor werk, het ons besluit om op ons eie te gaan. Altwee van ons is passievol daaroor en ons werk baie goed saam. Ons is baie dieselfde en kry daarom min stry, wat maak dat ons soos ‘n goed geoliede masjien kan werk. Ons ken ook mekaar se streke en het so bietjie meer genade met mekaar se tekortkominge, wat sorg vir 'n goeie werkatmosfeer. 

Hoe het jou opleidingspad na skool gelyk? 

Ek is na skool kollege toe om my ambag te kry. In die proses het ek as dieselwerktuigkundige gewerk met spesialisering in Cummings-, Detroit- en Caterpillar-enjins, asook Fuller-ratkaste. Ek het later my rigting verander na passer en draaier toe en het 'n hidrouliese kursus op Kathu gedoen. 

Wat is die lekkerste van jou werk? 

Ek is mal daaroor om 'n rou stuk metaal te neem en iets daaruit te skep wat bruikbaar is - die skep van nuwe dinge maak my trots. 

Wat is die moeilkste van jou werk? 

Daar is tye wat jy deur die nag moet werk om seker te maak jy kry klaar. Jy word maar moeg en jy moet hard konsentreer om jou kop te hou sodat jy nie foute maak of jouself beseer nie. Ongelukke gebeur baie vinnig wanneer mens moeg is en somtyds kan dit lewensgevaarlik wees. 

Vertel 'n storie van jou werk 

'n Paar jaar gelede toe ek moeg gewerk was, het iemand in die nag gebel oor 'n breakdown ('n lorrie wat langs die pad gebreek het). Denise, met wie ek nou getroud is, het saam gegaan daarheen en vir my die gereedskapstukke aangegee wat ek nodig gehad het terwyl ek aan die trok gewerk het. Ons het 'n hele paar uur so saamgewerk, ek sal dit nooit vergeet nie. 

Was daar enige rolmodelle in jou lewe? 

Pieter van den Berg was. 'n Oom wat tyd gemaak het om my die fynere vaardiged van die werk te leer. My neef, Hein Fourie, het my basies alles geleer van die ambag - sonder hom sou ek nie hierdie werk kon doen nie. 

Vertel ons meer van jou tatoes

Elke tattoo op my lyf vertel 'n storie uit my lewe, stories oor ervaringe wat my gevorm het as mens wat ek nie wil vergeet nie. Op my regterarm het ek my familie se name en kind van God in Chinees. - Dupie Janse van Rensburg

 

 

 

Is jy al 'n lid van ons Facebook?

Read 159 times

Leave a comment

Make sure you enter all the required information, indicated by an asterisk (*). HTML code is not allowed.

booked.net
Watter kompetisie wil jy aan deelneem?