Ontmoet vir: Anmari Coetzee
 

Ontmoet vir: Anmari Coetzee

Van voëltjies versorg tot veearts-verpleegster is Anmari Coetzee (22) se storie. Sy is gedrewe, aanpasbaar en empaties met mense en diere. Vandag is sy ’n veearts-verpleegster in Kimberley wat haar werk met passie aanpak en nie vir lang ure of vroeg opstaan skrik nie. 

Kinderdae op 'n melkplaas


Anmari het grootgeword op 'n melkplaas, net buite Bloemfontein. “My gunsteling-herinneringe is om, nadat ek smiddae van die skool af gekom het, na die stal toe te gaan. My pa was gewoonlik besig om die koeie te melk. Hy het altyd vir my 'n koppie warm melk gegee en ek het met die stalkatte gespeel. Ek kan onthou hoe ek diertjies huis toe gedra het, van kolganse tot boerbokke. Dit was vir my en my pa beide baie lekker om hulle groot te maak en dan vry te laat. Vir my ma was dit nie altyd so lekker nie. Haar roosbosse het altyd in die slag gebly. Ons is 'n mengelmoes van verskillende persoonlikhede in ons huis. Ek aard wel meer na my pa en my sussie as na my ma, maar ons is baie geheg aan mekaar."

Anmari vertel dat sy weet sy kan staat maak op haar mense en hulle is almal altyd daar vir mekaar. Help aan mekaar is een van die belangrikste eienskappe wat sy uit haar grootwordhuis kon neem. "Ons maak altyd die grap dat ons die weirdste familie is, maar dis wat dit so lekker maak. There's never a dull moment."

Louzanne Coetzee, 'n Suid-Afrikaanse vroulike Paralimpiese atleet, is haar ouer sussie. Sy hou tans die wêreldrekord in die T11-kategorie van die vroue se 5000 m. Sy het al deelgeneem aan die Wêreldpara-tletiek Grand Prix, asook 'n nuwe Afrika-rekord in die T11 800 m opgestel. Sy studeer op Kovsies en is ook koshuismoeder. "Ek is baie trots. Sy het onlangs aan die Londen-marathon deelgeneem. Sy het my al so baie in my lewe geleer, maar om elke dag te sien hoe sy haar eie uitdagings aanpak, is 'n groot inspirasie. Sy gee doodeenvoudig net nooit op nie."


Elke werk het sy oomblikke


“Ek wou nog altyd iets met diere doen. Ek het altyd net gefokus op veeartseny, maar toe ek begin navorsing doen oor verskillende diergeoriënteerde beroepe, het ek besluit op verpleging geval. Elke dag het sy oomblikke, goed en sleg, en dit is hoekom ek so baie hou van wat ek doen. Dis nooit dieselfde nie en mens pas aan. Ek hou daarvan dat dit my op my tone hou.”

Verskeie dinge deur elke dag maak dit vir Anmari in hierdie beroep die moeite werd. “Een van die beste oomblikke is om die uitdrukking op ’n eienaar se gesig te sien sodra ek sy troeteldier van agter af bring wanneer hulle huis toe kan gaan. Hulle kan nie hulle vreugde wegsteek nie. Dit is liefde en eg. Dit maak hierdie beroep elke keer die moeite werd en ek besef opnuut hoekom ek dit doen.”

Anmari se tyd vir haarself


Daar is ’n klomp goed waarvan Anmari hou om te doen buiten haar werk. Sy is kunstig en sal graag teken en skets. "Ek sing permanent, as dit tel as 'n stokperdjie,” lag Anmari. Meeste van haar vrye tyd bestee sy eintlik by die kliniek. “Ek werk baie aande aan die maandelikse veldtogte van Kimberley-dierekliniek, ek dink dis ook in 'n mate ’n stokperdjie. Ek leer ongelooflik baie deur al die artikels te skryf, ek is mal daaroor.”

Jy kan nie gemaklik raak nie


Anmari het al baie uitdagings in haar lewe gehad. Die afgelope jaar en 'n half op sigself was 'n baie groot aanpassing vir haar. "Ek is 'n mens wat hou van 'n gemaksone, dus is die grootste struikelblok vir my 'n daaglikse een - in my beroep bring elke dag vir jou ander uitdagings wat jy moet oorkom en jy leer elke keer daaruit. Jy kan nie gemaklik raak nie. Veral nie by die Kimberley-dierekliniek nie. Elke liewe dag is 'n oorwinning. Elke troeteldier wat gesond huis toe gaan tot elke sjirurgie wat suksesvol is - always celebrate the small victories."

My hele lewe lê voor my


Anmari sal graag ander wil motiveer om die beste van hulleself uit te leef. “Doen elke ding wat jy doen tot die beste van jou vermoë. Maak nie saak wat dit is nie, en of iemand kyk of nie. Ek leer baie by die mense saam met wie ek werk en dit is wonderlik om te sien hoeveel moeite hulle insit wat niemand anders eers van weet nie. Ek wil ook so wees.”


Anmari se raad vir ander is om nooit op te hou veg vir dit waarin jy glo nie. “Jou passie is die moeite werd en jý is die moeite werd. Gee soveel van jou menswees vir ander mense as wat jy kan, maar pas jouself ook op. Jy kan nie gee as jy self niks oor het nie. Ek weet nie wanneer of hoe of waar my drome gaan waar word nie, maar my hele lewe lê voor my om dit te bereik." - Elicia Grobbelaar

Is jy al 'n lid van ons Facebook?

Read 292 times

Leave a comment

Make sure you enter all the required information, indicated by an asterisk (*). HTML code is not allowed.

booked.net
Watter kompetisie wil jy aan deelneem?