Couple: Saam tot die dood ons skei...
 

Couple: Saam tot die dood ons skei...

Johann en Alta Hofmeyer glo dat paartjies saam die lewe se storms moet trotseer - dra mekaar deur die slegte tye en vier die goeie tye saam.

Alta, wat het jy in Johann raakgesien?

Sy vriendelike persoonlikheid en die feit dat hy ’n omgee-mens is.

En jy, Johann?

Alta was ’n stil, misterieuse meisie wat altyd saam met my vriend se meisie was. Ek het egter eers na skool besef dat ek eintlik baie van haar hou. Ses jaar later is ons getroud.

Wat verwag julle van ’n huwelik?

Ons albei glo ’n mens moet altyd vir mekaar omgee en probeer om die beste in die ander persoon na vore te bring.

Dink julle ’n mens kan jou hele lewe lank vir een mens lief bly?

Vir seker. Kyk byvoorbeeld na ou mensies in die ouetehuis wat hulle hele lewe vir mekaar deur dik en dun lief gebly het soos wat hulle op hulle troudag belowe het. Ons glo ’n mens moet aanhou veg vir die persoon wat jy lief het.

Wie was julle rolmodelle?

Johann: My rolmodel is my oupa John. Hy het my baie oor die lewe geleer en gewys ’n mens kan tot die dood julle skei onvoorwaardelik lief vir jou vrou wees, soos wat hy vir my ouma liefgehad het.

Alta: My rolmodel is definitief my ma. Sy het my gewys hoe om ’n sterk vrou te wees, ten spyte van swaar tye in jou lewe. Sy het my geleer om my kop hoog te hou en altyd ’n omgee-hart te hê. Sy is die reinste vorm van liefde wat ek ken. Ek kan altyd op haar ondersteuning staatmaak, wat die wêreld vir my beteken.

Alta, wat het jou ma jou oor verhoudings geleer?

Sy het my geleer ’n mens kan vir ’n ander persoon onvoorwaardelik lief wees en hom of haar aanvaar net soos hulle is. Sy het my ook geleer ’n mens moet nooit kwaad vir mekaar gaan slaap nie en wat ook al pla, uitpraat. Staan by mekaar in goeie en slegte tye.

Dink julle dis belangrik om pret in julle huwelik te hê? Hoe kry julle dit reg?

Ja, definitief. Ons is albei lief vir die buitelewe en probeer gereeld iets avontuurlustig.

Verhoudings is egter ook harde werk. Wat doen julle as daar probleme is?

Verhoudings is harde werk, maar ons maak dit maklik deur te praat as daar iets is wat pla. Ons sorteer probleme sommer baie vinnig uit.

Dink julle dis belangrik om dieselfde belangstellings te hê?

Nee, nie noodwendig nie. Elke persoon is uniek. Ons voel dat ’n mens die ander persoon en mekaar se verskille moet respekteer. Ons probeer om meer van mekaar se belangstellings te leer, maar glo dat juis ons verskille maak dat ons so goed oor die weg kom en by mekaar pas.

Baklei julle baie?

Ons het soms ons verskille, maar ons het nog nooit regtig baklei nie.

Wie sê eerste jammer?

Alta sê gewoonlik eerste jammer as ons ’n onderonsie gehad het.

Was dit moeilik om aan die begin saam te bly?

Ja en nee. Ons moes aan mekaar se roetines gewoond raak. Ons gaan al so lank uit dat ons reeds die meeste van mekaar se gewoontes leer ken het, wat dit baie makliker maak om by mekaar aan te pas.

Watter uitdagings was daar al in julle huwelik?

Ons is nog nie so lank getroud nie, so ons het nog nie regtig enige uitdagings ervaar nie. Ons weet ons sal deur die lewe ’n hele paar sakke sout saam moet opeet, maar ons het belowe om mekaar deur dik en dun by te staan en vir mekaar te veg en dit is wat ons wil doen.

Beskryf julle perfekte date

Om ’n entjie fiets te gaan ry en iewers tussen niks en nêrens in die veld ’n piekniek te hou om net in die natuur mekaar se geselskap te geniet.

Wat is julle raad vir ander jong mense?

Moet nooit ophou baklei vir mekaar nie. My vriendin het in haar toespraak op ons troudag ’n baie waardevolle aanhaling uit die rolprent, The Notebook, vir ons gegee. Noah het aan Allie gesê: So it's not gonna be easy. It's going to be really hard; we're gonna have to work at this every day, but I want to do that because I want you. I want all of you, forever, everyday. You and me... every day. Die aanhaling het ons baie geraak en ons wil dit ons motto vir ons huwelik maak en ons glo as ’n mens so redeneer, jy vir altyd saam sal wees. – Ilette Coetzer

 

 

 

 

Is jy al 'n lid van ons Facebook?

Read 81 times

Leave a comment

Make sure you enter all the required information, indicated by an asterisk (*). HTML code is not allowed.

booked.net
Watter kompetisie wil jy aan deelneem?