Praat saam: Die effek van angs
 

Praat saam: Die effek van angs

Om 'n Suid-Afrikaner te wees, is om jouself met uiteenlopende realiteite te versoen. Die beeldskone land met sy mooi mense en oorwinnings staan in strak teenstelling met misdaad, korrupsie, werkloosheid en ander sosiale euwels. Baie mense leef in vrees en mismoedigheid as gevolg hiervan. Chris en Lenie Heuer het  'n jaar gelede besluit om pro-aktief te wees in die geveg teen vreesagtigheid in hulle gemeenskap deur 'n seminaar met die naam Vreesloos aan te bied. Glitter het met hulle gesels oor die kuur vir vreesagtigheid in Suid-Afrika. 

Wat is julle definisie van vrees? 

Daar is 'n verskil tussen vrees en angs. Vrees is 'n ingebore emosie wat God ons gegee het om onsself mee te beskerm. Dit is 'n baie intense, skielike emosie wat ons in staat stel om te veg teen gevaar of te vlug weg van gevaar.   

Angs is in vandag se lewe 'n problematiese emosie omdat ons sukkel om met ons angs saam te leef en dit uit te sorteer. Ons raak angstig omdat ons 'n situasie ervaar wat ons nie kan hanteer met die nodige veg-of-vlug reaksie nie. Angs is dus aanhoudende vrees, vrees wat nie opgelos word nie. 

Wanneer ek angstig is, blok ek nuwe sensasies uit. Ek kan dus nie 'n nuwe vreessituasie korrek waarneem nie, want ek is vasgevang in my angstigheid. So kan ek vir langer cope met die situasie, maar wanneer daar nie 'n oplossing vir die aanhoudende vrees is nie, raak ek vasgevang in vrees en word ek eintlik emosioneel verslaaf aan vrees. So word ek vasgevang in 'n bose sirkel van vrees. 

Aanhoudende angstigheid blokkeer naderhand moontlike oplossings uit en denke word rigied en draai net rondom dieselfde probleem sonder om by 'n wyse oplossing uit te kom. Dit raak verlammend en daar kan later nie by 'n oplossing uitgekom word nie. Vrees oor die toestand van ons land en wat in ons land gebeur, is 'n tipiese voorbeeld van so 'n bose, angstige siklus van denke waarin ons vasgevang kan word. 

Watter vreeservarings moes julle as gesin aandurf? 

In 2012 word ons huisgesin self gekonfronteer oor vrese oor ons land en moontlike oplossings elders. Ons seun is pas afgestudeer en kan na vier jaar op universiteit geen vaste aanstelling kry nie. Werk vir 'n jongman is uiters belangrik, maar wat maak jy as jy nêrens ‘n aanstelling kan kry nie? 

In dieselfde jaar studeer ons dogter by Hillsong in Australiê. Sy het dit so baie geniet - dit is so anders daar - veiliger, minder armoede en geweld, baie meer geleenthede. Ons as ouers het die heeltyd met die volgende vrae geloop: Sal sy ooit wil terugkom Suid-Afrika toe?  Wat kan SA haar bied? ens.

In Junie 2018, net voordat ons die eerste Fearless-seminaar aanbied, sit my dogter en haar man albei sonder werk en sonder heenkome met 'n baba wat ses maande oud is! Dalk moet ek ook net noem dat twee van my boeties geëmigreer het. Ek weet presies wat dit behels en hoe erg dit is vir dié wat agter moet bly - die verlange, die gemis in deel wees van mekaar se lewe. 

Hoe is die idee vir die seminaar gebore? 

Ons het verlede jaar begin om jaarliks 'n Fearless-seminaar as 'n gesin aan te bied. Ons het as gesin 'n paar ervarings gehad waar ons werklik moes oorwinning kry oor vrees en die invloed van vrees op jou lewe. God self het ons vreesvolle situasies kom omdraai en daarom, uit dankbaarheid, het ons besluit om ‘n Goddelike perspektief te bring na mense wat vasgehou word deur vrees, angs, depressie of verslawende gewoontes in 'n poging om beter beheer te hê oor hulle lewens en werkende antwoorde vir vrees te bied. As terapeut is ek veral ook bewus daarvan hoe tieners met vrees worstel en daarom het ons aparte sessies wat op tieners van toepassing is.

Wat is volgens julle die antwoord op vrees? 

Vir ons begin die antwoord op vrees by die besef van die aard daarvan. Ons is oortuig dat die oorlog teen vrees 'n geestelike een is en ook dat dit die enigste volhoubare oorwinnings inhou. Daar is baie ander korttermyn kitsoplossings, maar ons glo dat vrees op die langtermyn slegs  deur 'n verhouding met die Here oorwin kan word. Daar is baie gedeeltes in die Bybel wat die idee beaam waarvan die volgende drie ons gunstelinge is: 

Fil. 4:6-7 

“Moet oor niks besorg wees nie, maar maak alles met danksegging aan God bekend. En die vrede wat alle verstand te bowe gaan, sal oor julle hart en gedagtes die wag hou.” 

Joh. 16:33 

“Dit sê Ek vir julle, sodat julle vrede kan vind in My. In die wêreld sal julle dit moeilik hê, maar hou moed - Ek het die wêreld klaar oorwin.” 

Joh. 10:10 

“Die satan het gekom om te slag en te steel en te verwoes, maar Ek het gekom dat julle lewe in oorvloed mag hê.” 

Ons moet die negtiewe bose kring van vrees en angstigheid breek deur waarhede van die Woord te gebruik om ons denke te vernuwe. Wanneer ons begin anders dink oor dinge verander ons vreesgedagtes. Daarvoor moet ons God en die waarhede in Sy Woord werklik ken. 

Wat is julle drome vir die land? 

Ons droom vir ons land is 'n stabiele land waarin alle mense kan lewe in die genade wat God ons gee, met liefde, medelye en omgee vir mekaar, met volwasse mense wat volwasse besluite neem waarby almal kan baat wat bereid is om te bou aan 'n beter SA - 'n land waar mense God sal ken en dien en nie eiebelang sal najaag nie. 

Ons droom vir ons kinders en kleinkinders is dat hulle werklik God sal ken en vir Hom sal lewe, maak nie saak waar hulle is nie. Dat hulle deel sal wees van Sy oplossing en genade vir die stukkende wêreld om ons. 

Wat is vyf wenke wat julle het vir mense wat vreesagtigheid wil beveg? 

  •  Weet dat om teen vrees te baklei en deur vrees gekonfronteer te word, eindig nooit nie - maak nie saak waar jy jou bevind nie. Jy kan egter verlos word daarvan om deur vrees gekontroleer te word. Hou aan God vas, vertrou op Hom. 
  •  Oppas dat vrees nie jou identiteit word nie. Onthou dat dit wat God vir ons gedoen het groter is as wat iemand aan jou kan doen. 
  • God belowe nie maanskyn en rose nie, maar wel oorwinning in elke situasie ongeag die omstandighede, want  2 Kor. 5:7b sê: “Want ons lewe deur geloof, nie deur sien nie.” Die voorwaarde hiervoor sien ons raak as ons verder in hierdie hoofstuk lees.  Dit word duidelik dat 'n mens in 'n intieme, persoonlike verhouding met Jesus moet lewe. 
  • Die bose sal probeer om jou vas te vang in 'n sinnelose bestaan - dit mag vrees wees in SA of gemaksug in Europa, maar die antwoord is daarin om jou bonatuurlike roeping en vrede in Jesus te vind. - Du Plessis Janse van Rensburg

 

 

 

 

 

 

 

 

 

Is jy al 'n lid van ons Facebook?

Read 110 times

Leave a comment

Make sure you enter all the required information, indicated by an asterisk (*). HTML code is not allowed.

booked.net
Watter kompetisie wil jy aan deelneem?