Sport: Benu Meintjies
 

Sport: Benu Meintjies

Benu Meintjes se vernuf op die atletiekveld het hom 'n studiebeurs by een van die voorste universiteite in Amerika besorg. Glitter het met die begaafde Kimberliet gesels oor sy besondere prestasies en die pad vorentoe. 

Wie is Benu Meintjes? 

Ek is die jongste van vyf kinders, gebore op 18 Februarie 2000 op Upington waar ons gebly het totdat ons in 2004 Kimberley toe verhuis het. Ek het van ouderdom ses af aan atletiek en landloop begin deelneem. Ek was in Laerskool Newton en Hoërskool Diamantveld. Op laerskool het ek aan atletiek, landloop, skaak, krieket, rugby en tennis deelgeneem. Op hoërskool het ek net atletiek gedoen. My gunsteling was atletiek en rugby. 

Ek hou daarvan om my vrye tyd by die rivier of op die plaas deur te bring waar ek kan ontspan en rustig raak. My gunstelingstokperdjie is om te gaan jag of om met skaap te werk. Ek glo ’n mens moet by jou waardes staan, maak die saak wat nie. Ek glo om sukses te behaal, moet jy gedissiplineerd wees in dit wat jy doen en ook harder werk as die ander mense wat na dieselfde doel toe werk. 

Wat is van jou prestasies op die atletiekveld? 

Ek het in graad 4 ( 2010) SA’s toe gegaan vir verspring. Ek het toe eers weer in graad 9 (2015) ASA-kampioenskappe toe gegaan vir die 400m. In graad 11 (2017) was ek tweede by die SA’s in die 400m O/18 en vierde in die 200m O/18 en ook derde in die 400m O/18 by die ASA-kampioenskappe. In graad 12 (2018) was ek weer derde in die 400m vir seuns O/20 by die ASA-kampioenskappe. 

Hoe het jy die beurs losgeslaan? 

Ek het in 2018 derde gekom in die 400m vir seuns onder 20 by Atletiek Suid Afrika (ASA) se jeug- en junior kampioenskappe. ’n Paar weke later het ek ’n brief gekry vanaf World Wide Scholarships wat sê dat ek ’n goeie kans staan om ’n beurs te kry. Ons het hulle toe gekontak en dit is hoe die hele proses begin het om die beurs te kry. 

Buiten jou prestasies op die veld het jy ook op akademiese terrein presteer - vertel ons meer daarvan 

Ek het Afrikaans huistaal, Engels eerste addisionele taal, wiskunde, lewensoriëntering, rekeningkunde, fisiese wetenskappe en ekonomie gehad en ek het ook besigheidstudies as ’n agtste vak gehad. Vir die eerste sewe vakke het ek onderskeidings gekry. 

Hoe het die keuringsproses vir die beurs gewerk? 

Dit het begin by 'n besoek aan die kantore van World Wide Scholarships vir ’n onderhoud. Dit was stresvol, maar alles het darem goed verloop. Ek en my pa, wat ook my afrigter is, was 'n ruk later Amerika toe waar ek na vier verskillende universiteite toe gegaan het om te kyk van watter een ek hou en watter een ek dink die beste vir my sal wees. Dit was ook stresvol, maar dit was ’n groot belewenis. 

Wat dryf jou en hoe hanteer jy spanning? 

Ek weet my talente is gawes van bo en daarom wil ek dit so goed as moontlik benut en dit nie tot niet laat gaan nie. Ek wil vir myself geleenthede in die lewe skep. Ek wil ook die heeltyd myself verbeter sodat ek vooruit kan gaan in die lewe. Dit is baie belangrik om 'n plek te hê waar jy kan rus en van alles vergeet soos wat ek by die rivier of op die plaas doen. Voor ’n wedloop is dit net bid en fokus wat die stres kan verminder. 

Wat was jou weeklikse roetine op skool? 

Ek het sewe-uur skool toe gegaan, twee-uur van die skool af gekom, geëet en dan ’n middagslapie geneem. Ek het dan weer vieruur opgestaan en reggemaak om te gaan oefen. Ek het vyfuur gaan oefen en as ek klaar was, het ek weer geëet en dan van so agtuur begin met huiswerk en as dit klaar was, het ek gaan slaap. As ek moes toets skryf of as ek baie huiswerk gehad het, het ek die middagslapie gelos. Ek het baiekeer voor skool ook gaan oefen. 

Vertel ons van jou afrigter 

Ek dink ek is baie bevoorreg om my pa te hê as my afrigter. Vir baie mense werk so ’n kombinasie glad nie lekker nie, maar ons het dit laat werk. My pa het op skool self ook atletiek gedoen. Hy het SA’s gewen in die 400m en die 800m. Hy is ’n baie streng afrigter en werk alles presies uit. Sy metode van afrigting bevat 'n bietjie van alles. Hy het self gesê dat hy nie alles weet nie en daarom het hy baie navorsing gaan doen en so het hy sy eie unieke metode ontwikkel. Hy het nie altyd baie gepraat op die dag van ’n wedloop nie, maar in die week voor ’n wedloop wel. Hy het op die dag van ’n wedloop net gesê dat dit nou of nooit is en dat ons klaar al die harde werk gedoen het en dat ek dit nou net moet gaan klaarmaak. 

Wat was vir jou die moeilkste dele van die pad wat jy tot nou moes stap? 

Die moeilikste deel van die pad wat ek sover gestap het, is vir seker die beserings en om nie op te gee wanneer jy ’n besering kry nie. 

Wat is jou drome vir die toekoms? 

Ek sal baie graag atletiek as ’n loopbaan wil volg. Daarna sal ek seker my graad gaan toepas en op die ou end wil ek gaan boer. 

Hoe voel jy oor jou studies in Amerika wat eersdaags begin? 

Ek is vreeslik opgewonde. Dit is ’n heel nuwe hoofstuk in my lewe wat begin en ’n massiewe voorreg. Ek kan nie wag om te sien hoe dit gaan wees nie, maar ek weet dit gaan glad nie maklik wees om so ver van die huis af te wees nie en om so ver weg van die mense af te wees vir wie jy lief is nie.

Watter drie lesse het jy geleer op pad na jou prestasies? 

Jy werk vir die toekoms en moenie in die hede vaskyk nie. Selfdisipline en deursettingsvermoë is krities belangrik as jy iets wil bereik. Moet ook nooit jou eie beuel blaas of te veel van jouself dink nie, want daar is altyd iemand wat beter as jy is of wat meer weet as jy. 

Watse nalatenskap wil jy eendag agterlaat? 

Ek wil ’n verskil in die wêreld maak, nie net akademies of sportgewys nie, maar ek wil die platform wat ek daardeur kry, gebruik om die wêreld nader aan die Here te bring. Ek wil ook die regte voorbeeld stel vir enige persoon wat my sien, want daar is ’n spreekwoord wat sê dat jy die enigste Bybel is wat sommige mense gaan lees. - Du Plessis Janse van Rensburg

 

 

 

 

 

 

 

 

 

 

 

 

 

 

 

Is jy al 'n lid van ons Facebook?

Read 410 times

Leave a comment

Make sure you enter all the required information, indicated by an asterisk (*). HTML code is not allowed.

booked.net
Watter kompetisie wil jy aan deelneem?