Talks about: Hoe belangrik is selfsorg
 

Talks about: Hoe belangrik is selfsorg

Daar is baie tipe jeukplekke in die lewe en 'n verskeidenheid opsies waarmee jy hulle kan krap, maar soms weet net jy waar dit regtig jeuk en so ook waar presies om te krap. Een manier hoe jy daardie jeuk kan bykom, is deur selfsorg toe te pas. Selfsorg is presies wat dit sê - om vir jouself te sorg en te versorg. Baie mense vind dit egter moeilik om dieselfde deernis met hulleself te hê as met die mense wat hulle omring. Glitter het met Nadine Meintjies, ‘n geregistreerde berader met 'n honneurs in sielkunde, gesels oor selfsorg se rol in geestesgesondheid. 

Vertel meer oor jouself 

Ek is getroud met twee kinders en is tans swanger met die derde een. Ma-wees is dus ‘n groot deel van my lewe. Dit help my om al die vreugdes sowel as frustrasies en uitdagings van vrou-wees te verstaan. Ek het 'n hart vir mense en om mense te help om seer te verwerk, want daaruit kom nuwe lewe. Ek probeer ook met ander oë na mense en situasies kyk om regtig ‘n veilige plek sonder oordeel te bied. 

Ek het 'n honneursgraad in sielkunde en het 'n praktikum voltooi in traumaberading en gemeenskapsgeestesgesondheidberading. Ek is tans by die HPCSA (Health Professions Council of South Africa) as 'n berader geregistreer. Ek het ook 'n graad in Bybelse pastorale berading. 

Wat is van jou passies? 

Ek is passievol oor gesinne en veral vrouens, want as ‘n vrou swaarkry, het dit 'n invloed op haar man en kinders. So kry 'n hele gesin swaar en gesinne speel 'n baie belangrike rol in die vorming van elke mens se karakter. In my persoonlike lewe is ek mal daaroor om tyd te spandeer met 'n mooi boek en koppie hot chocolate. Sulke rustige oomblikke in die lewe is egter skaars.   

Hoe sal jy selfsorg definieer? 

Selfsorg vir my beteken om regtig in voeling met jouself, jou emosies en behoeftes te wees. Dit beteken jy weet wanneer jy oormoeg of gespanne is en dan moet jy iets doen wat goed is vir jouself. Sommer net iets wat jy geniet of wat jou laat herlaai. Vir elke mens is dit iets anders: dit kan 'n borrelbad wees, koffie saam met 'n vriend of tyd tussen diere …enigiets wat jou laat herlaai. 

Watter tipe tekens wys selfsorg is nodig? 

Ons almal het sekere tekens wat ons waarsku dat jy nou moet selfsorg toepas - jy is meer emosioneel of huilerig, meer buierig of ongeduldig of jou gedagtes is meer negatief gefokus as gewoonlik en jy voel uitgebrand ('n soort moeg wat slaap alleen nie altyd regmaak nie). Wanneer jy een of 'n paar van hierdie tekens waarneem, is dit tyd vir selfsorg. 

Wat is die stappe om selfsorg toe te pas? 

Om selfsorg toe te pas, is redelik eenvoudig: 

Stap 1: Luister na die tekens dat jy gespanne of oorlaai is.  

Stap 2: Kies 'n aktiwiteit wat jy kan doen om jouself te herlaai.   

Stap 3: As jy dit nie dadelik kan doen nie, maak 'n afspraak vir  later die dag of week en hou daarby.  As jy nie tyd gaan opsy sit vir selfsorg nie, gaan dit nooit plaasvind nie, want daar sal altyd iets opduik wat belangriker voorkom.   

Stap 4: Moenie wag tot die tekens jou verras nie, maak selfsorg deel van jou leefstyl deur gereelde kort selfsorgafsprake te maak wat herhaal. So sal dit deel van jou lewensritme word en jy kan geestesgesondheid as 'n waarde uitleef. 

Wat is van die uitdagings wat jy al beleef het? 

Om 'n ma te wees en veral om al die rolle van werk, huis, man en kinders te balanseer, is 'n uitdaging. Dit is vir my belangrik om tyd te maak vir my kinders en om my beste vir hulle te gee, maar dit is soms 'n uitdaging as ek oormoeg of ongeduldig voel. Kinders het ook 'n manier om jou te wys op die areas in jou eie persoonlikheid of karakter waaraan jy kan verbeter. Dit voel vir my soos 'n groot spieël wat my wys waar ek nog bietjie aan myself moet skaaf en skuur. 

Watter tipe selfsorgaktiwiteite werk goed vir jou? 

My geloof is vir my baie belangrik en dit laat my altyd positief voel. Ek voel dat geloof (al verskil dit ook van myne) belangrik is, want dit gee jou iets om aan vas te hou deur die uitdagings en dwing jou ook om soms stil te raak en weer te onthou wat saak maak in die lewe.   

Oefening het ook 'n baie positiewe invloed op my gemoed, seker al daai endorfiene. Met kinders is dit vir my wel moeilik om te oefen, maar ons gaan stap saam as gesin en het ‘n bokssak by die huis.- Du Plessis Janse van Rensburg

 

 

Is jy al 'n lid van ons Facebook?

Read 240 times

Leave a comment

Make sure you enter all the required information, indicated by an asterisk (*). HTML code is not allowed.

booked.net
Watter kompetisie wil jy aan deelneem?