Nuwe horisonne
 

Nuwe horisonne

 

Jana Grobbelaar was vir amper agt jaar aan die stuur van Glitter as die publikasie se redakteur. Onder haar leiding is Glitter gevestig as die stem van die gemeenskap, waaruit baie mense inspirasie, troos en insig geput het. As ewige strewer na nuwe hoogtes het sy besluit om haar toe te spits op nuwe uitdagings in die toekoms, weg van haar rol as Glitter se redakteur. Glitter het met Jana gesels oor haar tyd by die publikasie, asook wat vir haar in die toekoms wink.

 

  1. Hoe het jy redakteur van Glitter geword?

 

My seuntjie was ’n paar maande oud toe die voormalige uitgewer van Glitter my gekontak het. Ek het pas klaargemaak by Volksblad as ’n verslaggewer en hy het die idee van Glitter met my bespreek. Dit was altyd my droom om ’n “tydskrif-redakteur” te wees.

 

  1. Wat was jou professionele agtergrond voor Glitter?

 

Ek het as ’n sub-redakteur vir Finesse-tydskrif gewerk en ook vryskutwerk vir Intiem, Baba en Kleuter en ander tydskrifte, aanlyn-publikasies gedoen. Voor dit was ek vir drie jaar ’n verslaggewer by die Volksblad en voor dit vier jaar by die DFA. Ek het oorspronklik skakelwesebestuur (PR) studeer en is tans besig met ’n BA in Afrikaanse Literatuur en Letterkunde.

 

  1. Wat het jy oor Kimberley geleer in jou tyd by Glitter?

 

Daar is niks wat daarby kom om ander se stories te vertel nie. Ek het soveel wonderlike mense ontmoet en dit inspireer my hoe ander mense lewe, hoe hulle dinge oorkom, hoekom en hoe hulle oor dinge voel. Ek is vreeslik gefassineer deur hoe iemand by ’n sekere plek uitgekom het.

 

Die span wat saam met my gewerk het, was ongelooflik. Mense het met mekaar begin praat. Nadat ’n storie gepubliseer is, sou lesers ons kontak met dieselfde tipe dinge waardeur hulle gaan of om hulp of inspirasie aan te bied. Dis wonderlik om te beleef.

 

  1. Wat was van jou treffendste stories wat in Glitter verskyn het?

 

Ek sal nooit die storie van Clivé Burger, wat haar seuntjie in ’n motorongeluk verloor het, vergeet nie. Clivé en ek het mekaar al ’n geruime tydjie geken en my seuntjie was ’n paar maande jonger as hare. Dit was ontsettend emosioneel om die artikel te skryf, veral omdat ek myself met die storie kon vereenselwig.

 

Die keer wat ons ’n klomp kaal vrouens op die voorblad vir vroue-maand gesit het, was bevrydend. Dit was wonderlik om te sien die effek wat soveel vryheid die vroue gee. Ons het ook al vir Karen Zoid op die voorblad gehad en onderhoude met bekendes gedoen. Daar is te veel om te tel. Ek het al die uitgawes in ’n dikband-boek. Dit sal altyd vir my kosbaar wees.

 

  1. Wat van jou tyd by Glitter sal by jou bly?

 

Glitter vorm so ’n integrale deel van my tyd in Kimberley. Aangesien ek nie ’n gebore Kimberliet is nie, het dit my lank geneem om aan te pas. Ek was mal daaroor om ’n verslaggewer te wees, maar om Glitter te doen, was baie spesiaal. Daar was meer tyd vir stories, ons het fotosessies beplan. Ek het mense leer ken. Dit was wonderlik om uit die boks te dink en die terugvoer van lesers was oorweldigend. Dit gebeur nooit dat ek iets op Facebook plaas en 'n klomp mense nie dadelik terug antwoord nie.

 

  1. Wat is volgende vir jou?

 

Ek het al vir baie jare ’n media-maatskappy wat webtuistes regoor Suid-Afrika het. Ek fokus nou op dié maatskappy, wat onder andere ook ’n aanlyn koerant, www.find-it.co.za, het waarvan ek redakteur is. Dis vreeslik opwindend, want die geleenthede aanlyn is legio. Elke dag is daar nuwe dinge om te leer – plus hou ek aan met wat ek by Glitter gedoen het. Net met ’n groter platform en meer vryheid.

Twee jaar gelede het ek ook ’n kinder-leesreeks begin waaraan ek weer werk en ons het nou saamgespan met ’n plaaslike skrywer vir meer volwasse stories ook. Dit is iets waarna ek baie uitsien. Die produksie-aspek van die maatskappy is vir my die lekkerste. Ons wil ook fokus op funksies en dinge wat Kimberley lekker maak – soos die Cell C Touchies wat ons nou by Tafel Lager Park aangebied het.

 

  1. Wat was die beste ding van jou werk by Glitter?

 

Die mense. Die ondervinding. Die hope en hope boeke wat deur ons hande is. Die verhoudinge. Die feit dat ons mense kon inspireer en energie gee.

 

  1. Wat was van die groter uitdagings van jou rol by Glitter?

 

Om afskeid te neem.

 

  1. Wat sou jy anders doen as jy dit weer kan doen?

 

Ek sou dit presies dieselfde doen.

 

  1. Is daar 'n laaste boodskap wat jy vir ons Kimberliete wil gee?

 

Hou aan om met my te praat in Spar. Vertel my jou storie. Laat ons toe om steeds jou uitlaatklep en jou platform te wees, om hoop te bring.

 

  1. Wat beteken skryf vir jou?

 

Skryf was nog altyd ’n uitlaatklep, maar ek dink aan skryf as ’n “vessel” om iemand anders se storie te vertel. As jy skryf, moet jy dit op so ’n manier doen dat die persoon wat dit lees jou storie hoor, voel, ruik, proe.

 

  1. Wil jy 'n laaste boodskap aan jou skrywerspan gee?

 

Baie dankie vir die afgelope sewe en ’n half jaar. Una Engelbrecht, ons proefleser, was by ons van die eerste uitgawe af. Alta van Wyk was die afgelope paar jaar saam met my en ons het mekaar goed verstaan. Malitza de Kock, wat die Glitter saam met ons begin het al die jare gelede, was ’n steunpilaar. Ek het hoeveel Sondagaande by haar opgedaag in my nagklere, dan “edit” ons tot laatnag. Die res: Ilette, Karen, Dupie, Elicia, Toinette, Martin, Melanie, julle was great.

Ilette Coetzee:

Alta van Wyk:

Elicia Grobbelaar:

Dupie Janse van Rensburg:

  

  1. Jy is ’n ma, besigheidsvrou van meer as een besigheid en is altyd op die uitkyk vir nuwe dinge. Waar kry jy jou krag energie en inspirasie vandaan? Wat is jou geheim?

 

Dis seker maar deel van jou persoonlikheidstipe. Ek hou van tyd op my eie en kry my energie en krag daar. Ek probeer deesdae om meer by my eie “boundaries” te hou en aandag sonder afleidings aan my kinders te gee. Om my energie op ander te reflekteer, hulle te inspireer, meer te laat bereik, talente te ontgin, gee my inspirasie. Dis vir my dié belangrikste en elke dag put ek krag daaruit. My idees raak nooit op nie en dit voel of ek deel is van ’n “dream machine”. My ander helfte is die doener. Dis amazing om te beleef. Ek het ’n idee en hy laat dit gebeur. Hy is my dream machine!

Die Glitter-span:

 

Is jy al 'n lid van ons Facebook?

Read 209 times
More in this category: « Ontmoet vir: Anmari Coetzee

Leave a comment

Make sure you enter all the required information, indicated by an asterisk (*). HTML code is not allowed.

booked.net
Watter kompetisie wil jy aan deelneem?